حابب أتكلم عن حاجة كدا في الإيطالي ,,, يمكن بيحسبها الأغلبية صعبة في الإيطالية وهي زمن الكونجينتيفو وتقسيماته وإزاي نستخدمه ومعناه أصلاً إيه وإيه مفهمومه أساساً؟
... ولأني شوفت ناااس كتييير بتشرح فيه وبصراحة معجبنيش شرح أي فيديو شوفته ليه لحد دلوقتي,, قصدي طبعاً لأن اللي بيشرح مش بيكون ملم بكل حاجة في الفيديو ,,,
بيقول كلمتين وخلاص,, وده اللي بيسبب صدمة للبعض لما يلاقي معلومة جديدة أو حاجة تصطدم باللي هو درسه ويحس بإحباط إنه مش هيتعلمه ...
لكن في البوست ده بدأية منه هقسمه كله إن شاء الله ومش هخلي فيه كلمة إلا وهقولها بإذن الله بالتفصيل الممل ...
في البوست ده هوضحلكم الفرق بين ال Indicativo وال Congiuntivo ومعنى كل كلمة فيهم أصلاً إيه عشان بس تهيأ عقلك كويس تستوعب كل اللي هييجي بعد كدا لأن الدرس ده هو الأساس اللي هيوصلك الفكرة وطالما وصلتك الفكرة العامة خلاص إنت كدا هتفهمه بسرعة جداً
.. قبل ما أنقلك ل شرح الكونتجيتيفو عايز بس أربطلك بينيه وبين ازمنة ال Indicativo اللي درستها قبل كدا .. ولما تعرف الفرق بينهم هتستوعب اللي هييجي بعد كدا عن الكونتجيتيفو..
==============
نبدأ كدا أولاً
Indicativo
( ده اللي هو بنقول عليه الأسلوب الخبري اللي هو بيخبر عن شئ ) إحنا بنستخدمه لما بنتكلم عن شئ حقيقي سواء بيحصل أو حصل في الماضي أو لسة هيحصل ومنه طبعاً الأزمنة اللي درسناها غير اللي هي ( Presente, futuro, passato, ecc )
\
والحاجات اللي هي غير الكونتجيتيفو ... بيستخدم لما تتكلم عن حقيقة مؤكدة أو شئ واقعي لا يتحمل الشك في معناه ..
.
يعني لما تقول مثلاً " انا سافرت / انا أكلت / أنا روحت " ,, إنت هنا بتخبر عن شئ حصل في الماضي ,, عن شئ مفيش صيغة شك في كلامك نفسه ...إنت بتقر شئ معين سواء حدث أو هيحصل أو بيحصل أصلاً في المضارع
=============.....
أما ال congiuntivo
ده بيحتمل الشك وعدم اليقين إن الحاجة دي هتحصل
طيب يعني إيه الكلام ده لأن سمعناه كتييير وبرضه مش واضحة لينا الصورة كويس ,, هو يعني إيه بيدل على الشك وعدم اليقين؟
بص يا سيدي ,, هحكيلك قصة بسيطة خالص ومنها هتفهم الكونجينتيفو كويس أوووي ...
أنا قاعد مرة في البيت كدا ,, ف حد رن عليا وقالي إلحق يا خالد صاحبك فلان ده عمل حادثة ونقلوه ع المستشفى ,,, ف أنا روحت على طول وقلقلت وورحت أتصلت بيه وهقوله
Spero che tu stia bene
اللي هو " أتمنى أنك تكون بخير " في حين إن ممكن الشخص ده ميكونش بخير( يعني ممكن يكون عمل حادثة فعلاً ومتصاب وممكن يكون الخبر كدب أصلاً ) فأنا مش عارف هل هوه بخير ولا لأ ,, ,,,
فأنت بعتقد وتتمنى حاجة ممكن تحصل أو لأ وهنا بقى الشك وعدم اليقين ...
لكن لو أنت قولت
Sto bene
( ده بقى أسلوب Indicativo وفيه إنت بتقر حقيقة مؤكدا بتأكد على شئ لا يحتمل الشك )
معناها إنت كويس فعلاً وده شئ مؤكد ,,,, عشان كدا أنت إستخدمت ال Indicativo
==============
لكن لو أنت بتتكلم عن حاجة إحتمالية الحدوث وغير مؤكدة وفيها شك أو عدم يقين,,, وقتها بقى بنستخدم ال
congiuntivo
حتى لو دخلت ع درس ال
congiuntivo
هتلاقي أن جايب معاه أفعال معينة تعرفك الزمن ده ,,, أفعال زي
"يظن=يعتقد=يتمنى=يريد أن=يخاف من=يخشى أن=يتمنى أن"
ودي كلها أفعال شك وعدم يقين
يعني لما تقول مثلاً
أظن إن أنا نجحت في الإمتحان
هل الجملة دي معناها " إنك نجحت فعلاً ؟
لأ طبعاً ,, انا بقول انا بظن ,, يعني كلامي بيميل للشك وعدم التأكد من الشئ اللي انا بتكلم عنه ده ... يمكن نجحت ويمكن لأ
===================
هحكيلك قصة تانية صغيرة تفهم منها الكونجينيفو..
أنا لما ظهرت النتيجة في الكلية وعلقوها على باب الكلية ,,, ف جه واحد صاحبي من اللي شافوا النتيجة وقالي " باركلي يا خالد انا نجحت ووالحمد لله " ,, هقوله هنا " مبروك بجد ,, طيب إنت مشوفتش إسمي في الناجحين ؟"
هنا بقى في إجابتين ل سؤالي ,, لو هو قالي " اه شوفت إسمك في الناجحين وكان كمان أول إسمك " ف هنا أسلوب خبري بيتكلم عن حقيقة مؤكدة يعني مفيش شك في طريقه كلامك ,,,
هو بيقولي أيوه شوفتك يعني هو شافني فعلاً... فهنا هيستخدم الأسلوب الخبري Indicativo اللي إحنا وضحناه فوق وهيقولي
Si, ho visto il tuo nome nella lista di quelli che sono riusciti
لكن هو مش متأكد من كلامه ,, هتلاقيه بقى بيحطلك كلمة كدا بتدي معنى عدم التأكد والشك من الشئ ده,, ف هيقولك " متهيقلي كدا شوفت إسمك في القائمة " ,,, أهي كلمة " متهيقلي دي إدت معنى عدم التأكد والشك وعدم اليقين ,,, وبتلاقيها بتتقال كدا Pensare ودي من الكلمات الي بييجي بعدها Congiuntivo ... ف هيقولها كدا
Penso che il tuo nome sia stato nella lista
( متهيقلي كدا / على ما اظن إن إسمك كان في القائمة)
======================
هديك مثال تاني جميل برضه هيوضحهالك أكتر ,,,,,
عندنا كلمة في الإيطالي بييجي وراها زمن indicativo وبتاخد كمان معاها زمن congiuntivo ,,, بس هي في الأساس بتندرج تحت الكلمات اللي بييجي معاها congiuntivo ...
بس انا حبيت أختارها ليكم عشان أوريلكم الفرق لو حد مثلاً لخبط وبدل اما يحط كونجينتيفو إختار Indicativo ,, إيه اللي هيحصل في الجملة وهل المعنى هيتغير وليه هتبقى غلط وهل هتبقى غلط فعلاً ولا هتبقى صح ؟ طيب لو هي صح من غير الكونجييتفو طيب ليه بندرسه أصلاً ؟
بص يا سيدي ,,, ركز معايا كدا
الكلمة اللي انا قصدي عليها هي كلمة Chiunque ,, ودي معناها أي حد ,, أي شخص ..
على سبيل المثال:
chiunque danneggia i beni di pubblica utilità presenti, è punito con l’ammenda
ودي ترجمتها (يعاقب كل من يضر بأصول المرافق العامة الموجودة بغرامة) ,,
هل القصد هنا " إن كل الناس بتضر بأصول المرافق العامة " ؟
لأ طبعاً ,, هو بيقولك لو أي حد بيضر بالمرافق العامة ده هيتعاقب .. وهنا جات الشك والشرط,, لأن الكونجيتيفو ده زمن شرطي ...
فهنا كلمة chiunque معناها " لو أي حد" ...
لكن لو جبت بعدها زمن خبري Indicativo ,, هيكون معناها " أي حد " يعني Everyone يعني كل الأشخاص اللي موجودين في الدنيا...
على سبيل المثال:
Chiunque ha il diritto di dire la sua
( كل شخص لديه الحق في التعبير عن رأيه)
وهنا لما إستخدمت الزمن الخبري عشان انا بقر حقيقة مؤكدا مش بحتمل شك في كلامي ...
=================================
طيب هديكم مثال تاني للتوضيح أكتر,,,
في أغنية عن النبي بتقول " من صلى صلاته وإتحلى بصفاته يا بخت اللي في ضله ماشي " ...
لو انا قولت
Chiunque abbia pregato e abbia avuto le sue caratteristiche buone, è stato fortunato
هيكون هنا معناها "أي حد صلى زي النبي أو إتحلى بصفاته هو إنسان محظوظ " ,,, هنا كلامي بيحتمل الشك يعني مش قصدي إن كل البشرية صلت زيه وإتحلت بصفاته ,, أنا بفترض بكلامي ,, بقول لو أي حد عمل كدا هيكون محظوظ
طيب لو الجملة خليناها في ال Indicativo هيحصل إيه ؟
طيب تعالى كدا نجرب ونشوف إيه اللي هيحصل
Chiunque ha pregato e ha avuto le sue caratteristiche buone, è stato fortunato
كدا إنت بتقول إن أي شخص في الدنيا صلى زي النبي أصلاً وتحلى بصفاته وكان كمان محظوظ ,, يعني إنت هنا قصدك تقول إن كل شخص موجود على الأرض صلى فعلاً زي النبي وتحلى بصفاته وكان محظوظ ...
==================================
ده الفرق بين الزمن الخبري Indicativo وزمن الشك Congiuntivo حبيت أوضح الفرق بينهم بالتفصيل وبشكل مبسط جداً وأتمنى أكون وفقت في كدا ,,,
ومش هدخل ع البوست اللي بعده إلا لما تقولوا البوست ده تمام جداً وتكون الفكرة وصلتلكم بجد لأن ده الأساس اللي عليه هتقدروا تفهموا اللي جاي كله
أتمنى تكونوا إستفدتوا من الشرح بجد,,, وأي سؤال يواجهكوا إكتبوه في كومنت